آرمان افسي د اتلانو لیګ په ۷۲مه لوبه کې عمر ځواک مات کړ
آرمان افسي د افغانستان اتلانو لیګ روشن د شپږم پړاو په ۷۲مه لوبه کې عمر ځواک ته پنځه پر یوه ماتې ورکړه. دغه سیالي د چهارشنبې په ورځ د افغانستان فوټبال فدراسیون په لوبغالي کې ترسره شوه.
آرمان افسي له پیل سره سم د لوبې واګې په لاس کې واخیستې. ډامولا ایسیولووا آکاني په اتمه دقیقه کې د خپلې لوبډلې لومړی ګول وواهه، ورپسې پیمان سلطاني په لسمه او اتلسمه دقیقه کې دوه ځله ګول وکړ او آرمان افسي یې درې پر صفر مخکې کړ.
عمر ځواک د لومړۍ نیمایي په اضافي وخت کې د محمد نوروزي له لارې د سیالۍ یو ګول جبران کړ. په دې سره لومړۍ نیمایي د آرمان افسي په ګټه درې پر یوه پای ته ورسېده.
په دویمه نیمایي کې هم آرمان افسي پر خپلو بریدونو دوام ورکړ. شکرالله کوهي د اضافي وخت پر مهال څلورم ګول وواهه او فردین عزیزي د اضافي وخت په پنځمه دقیقه کې د خپلې لوبډلې پنځم ګول ثبت کړ، چې لوبه یې په پنځه پر یوه بریا پای ته ورسوله.
پیمان سلطاني، چې په دې لوبه کې یې دوه ګولونه ووهل، د سیالۍ د غوره لوبغاړي جایزه ترلاسه کړه. آرمان افسي به په راتلونکې لوبه کې د اکتوبر پر ۳۱مه له عینو مېنې کندهار سره مخ شي، په داسې حال کې چې عمر ځواک به د نومبر پر دویمه له طوفان هرات سره ولوبېږي.
د افغانستان اتلانو لیګ روشن د شپږم پړاو ټولې لوبې د آریانا ټلویزیون له لارې په ژوندۍ بڼه خپرېږي.