افغانستان او بنګلهدېش په ابوظبۍ کې د ټېسټ لوبې پر ډګر

د افغانستان او بنګلهدېش ترمنځ یوازینۍ ټېسټ لوبه د افغانستان په کوربتوب د متحده عربي اماراتو په ابوظبۍ کې روانه ده. د لوبې پچه بنګلهدېش وګټله او پرېکړه یې وکړه چې لومړی توپوهنه وکړي.
د بنګلهدېش لپاره تنزید حسن ۸۳ منډې جوړې کړې، خو د افغانستان د توپ اچوونکي عصمت عالم په توپ یې خپله وېکټه له لاسه ورکړه. په لوبه کې د دواړو لورو لوبغاړي د خپلو هېوادونو د ټېسټ لوبډلو استازیتوب کوي.
د افغانستان لوبډله د رحمت شاه په مشرۍ له عبدالمالک، صدیقالله اتل، حشمتالله شهیدي، اکرام علیخېل، ضیاالرحمان، شاهدالله کمال، یمین احمدزي، قیس احمد، محمد سلیم او عصمت عالم څخه جوړه شوې ده.
د بنګلهدېش په لوبډله کې د نجمالحسین شانتو ترڅنګ شادمان اسلام، تنزید حسن، مومنالحق، مشفقالرحیم، لېټن داس، مهدي حسن میراج، حسن محمود، تاجالاسلام او عبادت حسین شامل دي.
د دې ټېسټ لوبې له پای ته رسېدو وروسته به افغانستان، بنګلهدېش او زمبابوې د اکتوبر له ۱۷مې تر ۲۳مې پورې درې اړخیزه یو ورځنۍ لوبلړۍ ترسره کړي. له هغې وروسته افغانستان له زمبابوې سره د درې شلاوریزو لوبو لړۍ لري. د افغانستان کرېکټ بورډ د معلوماتو له مخې، له دې لړۍ وروسته به د زمبابوې پر وړاندې د افغانستان لومړۍ ټېسټ لوبه د نومبر پر پنځمه او دویمه لوبه د همدې میاشتې پر ۱۳مه نېټه پیل شي.
د افغانستان کرېکټ بورډ ویلي چې د افغانستان، بنګلهدېش او زمبابوې ترمنځ د سیالیو دا لړۍ د درې واړو کرېکټ بورډونو د اړیکو د لا پیاوړتیا او پراختیا لپاره مهمه ده.