روسیه د طالبانو د رسمیت پېژندلو لور ته ګام اخلي

ژباړه: مینه احمد

سرچینه : The Bell

روسیه په پام کې لري چې طالبان د افغانستان د قانوني حکومت په توګه په رسمیت وپېژني او د منع شویو سازمانونو له لیست څخه یې وباسي.

د روسیې د بیل خپرونې د راپور له مخې، دا به هغه نامناسب حالت پای ته ورسوي چې د طالبانو استازي يې په رسمي ډول په کرملین کې لري. یعني نور به ژورنالیستان د طالبانو د نوم په یادولو نه مجازات کېږي. حاضردمه د دې لپاره چې طالبان په روسیه کې منع شوې ډله او تروریستي سازمان پېژندل کېږي ژورنالیستان په خپلو مقالو کې د دوی د ذکر کولو په خاطر زنداني کیدی شي.

تاس خبري اژانس د دوشنبې په ورځ راپور ورکړ، روسیه چمتو ده چې طالبان چې په 2021 کې یې په افغانستان کې واک ترلاسه کړ، د منع شويو سازمانونو له لیست څخه وباسي.

په دې اړه د بهرنیو چارو وزارت او عدلیې وزارت له لوري توافق شوی او ولادیمیر پوتین ته راپور ورکړل شوی.

د بهرنیو چارو وزارت اټکل کوي چې له دې وروسته به مسکو طالبان په افغانستان کې د قانوني حکومت په توګه په رسمیت وپیژني.

دا اقدام ممکن د اګست تر 19 مخکې ترسره شي یعني هغه نیټه چې طالبانو د متحده ایالاتو په ملاتړ حکومت څخه کنټرول ترلاسه کړ او لکه څنګه چې ویل کیږي، افغانستان “په دریو پیړیو کې درې امپراتورۍ ړنګې کړې”: د بریتانیا، شوروي اتحاد. او متحده ایالاتو.

طالبان له ۲۰۰۳ کال راهیسې په روسیه کې یو منع شوی سازمان دی، خو هر څومره چې له لویدیځ سره د روسیې اړیکې خرابې شوي، هغومره یې له طالبانو سره اړیکې ګرمې شوي دي.

د روسیې او طالبانو ترمنځ د نژدې اړیکو حقیقي پیل په 2015 کې و چې روسیه د سوریې په جګړه کې ښکیل شوه. په هغه وخت کې روسي چارواکو د داعش او القاعدې په وړاندې د طالبانو په دښمنۍ تکیه کوله (چې په روسیه کې هم منع شوي دي).

د مسکو دریځ تر یوې اندازې پورې ګټور و، کله چې د طالبانو واک ته رسیدل حتمي شو – د 2021 په اګست کې په کابل کې د بشپړې ویرې په وخت کې، د روسیې سفارت په نورمال ډول د اورپکو تر څار لاندې کار کاوه.

واک ته د دوی له راتګ راهیسې د طالبانو پلاوي په منظم ډول روسیې ته سفرونه کړي دي. سږکال، د طالبانو په مشرۍ د بهرنیو چارو وزارت په مسکو کې د کروکس ښار په تالار کې ترهګریز برید، چې داعش یې مسوولیت په غاړه واخیست، په کلکه وغانده، او د مې په میاشت کې د طالبانو رسمي پلاوي د “روسیه – اسلامي نړۍ” فورم کې ګډون وکړ.

له دې سره سره چې دد روسیې د قوانینو له مخې د منع شویو یا تروریستي سازمانونو د نوم یادول جرم دي، دولتي رسنیو د طالبانو د نوم ذکرلو ته دوام ورکړی. حال دا چې د هر چا لپاره، حتی د «طالب» یادونه هم د جنایي تورونو ګواښ پېښولی شي.

یوازې دوه اوونۍ وړاندې، خبریاله نادیزدا کیورکووا په مسکو کې د “ترهګرۍ د توجیه کولو” په تور ونیول شوه. د هغې په وړاندې له دوو تورونو څخه یو د طالبانو د تروریستي فعالیتونو توجیه کول دي. هغه تر اوو کلونو پورې په بند محکومه شوې ده.