احمد فواد لامع، د شاه حکيم زوی په ديارلس سوه و نهه پنځوسم لمريز کال د ليندۍ مياشتې په دولسمه نيټه، په کابل ښار کې زېږېدلی يم. پلرنی ټاټوبی مې د کابل ولايت د ميربچه کوټ ولسوالۍ د برو مشواڼي کلی او مورنی ټاټوبی مې د کندهار ښار دی.
په ديارلس سوه و شپږ اويايم لمريز کال د کابل د حبيبيې له عالي ليسې څخه بريالی شوی يم. په ديارلس سوه و اوه اويايم کال کې مې د کابل د طب انستيتيوت د معالجوي طب په پوهنځي کې لوړې زده کړې پيل کړې او د ديارلس سوه و پنځه اتيايم کال په پسرلي کې مې د کابل طبي پوهنتون د معالجوي طب له پوهنځي څخه بری ليک ترلاسه کړ.
که څه هم له خپل مسلک سره زياته مينه لرم خو له ادبياتو سره مې هم ځانګړې مينه ده او کله کله د شعر په نامه ځينې خورې ورې ټوټې ليکم. څلور کاله وړاندې د ويندويي لپاره ملي راډيو ټلويزيون ته ولاړم او څه باندې دوه کاله مې هلته کار وکړ. وروسته طلوع ټلويزيون ته راغلم او تر اوسه د خپلو طبي زده کړو ترڅنګ، د طلوع ټلويزيون په پښتو خبري څانګې کې د خبريال او ويندوی په توګه دنده ترسره کوم.