پښتو د ننګ او شجاعت نوم دی
پښتو د پت او د غیرت نوم دی
پښتو یوازې یوه ژبه نه ده
د یو تهذیب او ثقافت نوم دی
پښتو خو مرسته له مظلوم سره ده
د هر ظالم نه د نفرت نوم دی
پښتو تور سرو ته درانه کاته دي
د پېغلو جونو د عصمت نوم دی
پښتو د دین او د ایمان نخښه ده
د دیانت او شرافت نوم دی
پښتو د تورې نه مخ نه ګرځول
دا د جرآت او شجاعت نوم دی
پښتو میلمه نه مال و سر جارول
د دیانت او سخاوت نوم دی
پښتو، بې وزلو ته پناه ورکول
د قربانۍ او د همت نوم دی
خو د فرنګ د ملا هم واوره
وايي پښتو د جهالت نوم دی