لکه سیلۍ وه را لوتله خو ما نه لیدله
له ما نه ګرده تاویدله خو ما نه لیدله

هر مازیګر به شو لمبه بام به رڼا کوله
د بلۍ سرته به ختله خو ما نه لیدله

په وار خطا نظر یې یو دم راته وکتل خو
لکه د پا ڼې رپيدله خو ما نه لیدله

د ښاپيرو رانجه یې پوري کړه په خپلو سترګو
بله دنیا کې ګرځیدله خو ما نه لیدله

یو جادوګر شانته اواز مې غوږ ته ورسیده
بس صرف ټپه مې اوریدله خو ما نه لیدله

د نظر اور یې سم زما په بدن ولګیده
چې زما خوا کې تیریدله خو ما نه لیدله

بیداره ړوند نه ووم ړنده راته دنیا ښکاریده
ښپو نه مې ځمکه تښتیدله خو ما نه لیدله