د شونډو عطر

چې دې وخندل
د شونډو سره رڼا دې
د ګلونو سپینو پاڼو کې اوبه شوه
له یوې مخې د ونو شنه لاسونه شیرچايی شول

او د غږ په اوریدو دې
د غوټیو په سرو شونډو
زنګ وهلی قُفل مات شو
د عطرونو زړې پیغلې ټولې ووتې بربنډې

* **

چې خوږې سترګې مسکۍ شوې
له بڼوڅخه مې پورته دنرګیسو
تکه ژیړه خوشبويی شوه

* * * *

چې مې ګوتې ستاپه سرو منګولو کیښوې
سره ګلاب مې په لاسونو کې راشنه شول

درنژدې شوم په تندي باندې مې ښکل کړې
یوناڅاپه مې بدن ټول
طلايي شو

______________

قفل : کولپ