ځئ کنه يو څو ګامه ور مخکې شئ
ژوند پسې زما قامه ور مخکې شئ
نه شوه په جهاد غزا مو شل نه کړه
عشق ته له کوم بل نامه ور مخکې شئ

تل له پردي بامه رالويدلي يو
ستورو ته له خپل بامه ور مخکې شئ

ګورئ د ساقي حالت که بره و
تاسو هم دوه دری جامه ور مخکې شئ

ياد يې کئ دعا کې خپل دا وران وطن
ګورئ له کشمير شامه ور مخکې شئ

خدای هيواد او دندې مقدسې ته
تاسو له سيتا رامه ور مخکې شئ

کله کله تاسو هم ودير پسې
پام کوئ خو ناپامه ور مخکې شئ