که بیزاریم له پخوا یمه له ښاره
راوتلــې ترې بیگاه یمه له ښاره

لږ نژدې شه چې د زړه درزا مې واورې
څه په غوږ کې درته وایمه له ښاره

په قیصو قیصو په چل چل مې ویده کړو
وږې ځوئ مې کورته بیایمه له ښاره

دبدل رنگونو ښار دی نور څه نشته
دلته څه دي تاله راوړمه له ښاره

دنکریځو دوکاندار کفن فروش شو
همغه رنګونه غواړمه له ښاره

ډیر دې وویل له دې ښاره هر څه غواړم
ډیر مې وویل نور څه مه غواړه له ښاره

زه به خپله ترینه وځمه قسمته
په خندا خندا او ویاړمه له ښاره

که د تورې کرښې منځ کې یم آرینه
زه به دې کرښې نه واوړمه له ښاره