یه د زندان ساتونکیه!
یه زما د ټولې ازادۍ واکداره
ځان د خدای سیوری ګڼې
زه هم مجبور یم اطاعت دې کوم
ژوندون مې ستا په فرمایش کومه
ویښته مې هم ستا په رقم جوړ کړي
ږیري ته هېره کې هم لاس نه وړمه
او چې راغلی یې خندا نه کوم
ځکه پوهېږم اوس په دې زندان کې
خندا سزا لري
خو نن مې سل زړونه یو کړي سره
که مې د سر خېر وي نو
غواړم د زړه یوه خبره وکړم
یو عرض مې اورې که نه؟
یه د زندان ساتونکیه!
یه زما د ټولې ازادۍ واکداره!
زما د زړه غوښتنه منې که نه؟
زما پرون یاد شوی
غواړم بیا تېر ته لاړ شم
د مکتبۍ په خواږه نرم اواز
د یاقربان خوږه نغمه واورمه
او د پوهنتون د پېغلې
یوه زمزمه واورمه
یا مې د خپلې ابۍ
دغه ټپه واورمه:
له کلي تللیه چېرې ورک شوې
د بې وسۍ غږ به مې څوک در رسوینه