اوښکې د مور و پلار په سترگو کې ډنډ
د شریک ژوند ایښي نیالگي اوبوي
پېغله لورکۍ یې څنگ ښونځي کې د کور
د کتابونو پاڼې، پاڼې لوستې
زلمی بچی یې له پوهنتون فارغ و
د اُمیدونو غوټۍ گل غوړاوه
ناڅاپه تېزه سېلۍ والوتله
د انقلاب بله څپه راغلله
د بدو سترگو گلۍ وورېده
غونچه شوه پاڼې، پاڼې ورژېده
د کتابونو ځای ټوپک ونیوه
د دُنیا ټول منطق یې وننگاوه
د لوستي ځوان غرور شو مات، د بېکارۍ په پېغور
اوس یې د سخت سفر قمار ته، سر په داو ایښی دی
په صبر، صبر یونیم کال واوښته
بېوزلي گېډو پورې تیـږې تړي
واېې اسلام مو ټول جهان کې سوچه
ولې بیعت په پټو سترگو غواړي؟
گورئ چې بیا ټکه درپرې نه وځي
کاسه د ظلم تل نسکور پاتې ده!
۱۰/۴/۲۰۲۳

عبدالعزیز نایبي
ستاکلهم، سویدن

***************************************