د توت شیریني

دا مات زړه !
لکه دا ستا له سره ټيکري نه راپرې شوې ځوان غاټول
وایه په کومې غونډۍ کیږدم
چې یې ولیدای شې یاره ؟

د جنډې غوندې په کوم زیارت ورَپم
چې شمال مې ستا تر خوږ کاکله درشي ؟

او باران لکه د توت شیریني
د چا لامده پیکي نه وَڅنډمه تاته ؟
ته چې وريځ آسمان نه کرکه کوې تښتې

نو

په کومې څلور لارې ودریږم
چې مې ولیدای شي یاره
تاته لمر هم داسې ښکاري
لکه سپين وړوکی ځل
دا ستا د ګوتې شنه غمي کې
او سپوږمۍ خو
لکه ستا د زنې خال وي د چا خوله کې اوبه شوی

ــــــــــــــــــــــــ
ځل : ځلیدل