د خپل احساس له نزاكت نه مې سخن زخمي دی

د پستو ټكو په ضربونو مې دهن زخمي دی
هر يو وجود پرهر پرهر دی د غضب په غشو

يه مسيحا! څوك څوك به روغ كړې ، ټول وطن زخمي دی
ای د ستم اوچته داره! زۀ جواب غواړمه

دغه ترې څاڅي زما وينه، كه رسن زخمي دی
وخته! دې ظلم ته به ستا انصاف څه نوم وركوي

بخته! په خپلې تېشې سر د كوهكن زخمي دی
ما ته ګلان ښكاري تڼاكې د خپل سوي زړګي

زما په سترګو كه ئې وګورې، چمن زخمي دی
داسې خلوص په بل تړون کې څوك موندلی نه شي

سترګې اوښكلني دي د يار، زړۀ د مين زخمي دی
څه اندازه د هغه كرب، كوم چې په ما تېريږي

نه مې څوك زړۀ ويني ګـوهــره! نه مې تن زخمي دی

سعید ګوهر (21.08.2010–25.12.1947)