د بیلتون څړیکې

د بیلتانه ظالیمو څړیکو ځنګولی نه یې
لکه پتنګ پر سرو اورونو کړېدلی نه یې

ته نو د میني د دردو په خوند پوهیږي کله
ته لا تر اوسه ځان پر ځان باندي بایللی نه یې

تا کرۍ شپه د چا په یاد کې تیره کړې نه ده
ته د چا یاد له خواږه خوبه پاڅولی نه یې

خود دي ساتلی دی سینه کې روغ زړګی لیونی
ته لکه ګل د اغزو منځ کې اوسېدلی نه یې

لکه ماشوم داسي د ژوند له خوږو څکه کوې
د چا یادونو ، یادګارونو ځورولی نه یې

د هجر غشي دي د زړه پر سر خوړلي نه دي
ته و نیم لوستو کتابو ته ژړېدلی نه یې

ستا په یو چا پسي له غمه شونډي پرې نه سولې
د چا نشتون مشهود ملنګه دردولی نه یې