ستا په یادونو، زما په زړه دې خاورې واړولې
ګلې! د ژوند په هر یو څه دې خاورې واړولې

چې ستا خندا او ترنم ورځنې کډه وکړه
زما په بیخونده ژوندانه دې خاورې واړولې

هره تڼۍ ، هره ریښکۍ یې وه په اوښکو لمده
د یو مین په ګریوانه دې خاورې واړولې

په هره ساه کې یې بې واره، د چا نوم یاداوه
په یو مظلوم، شهید مرغه دې خاورې واړولې

هغې چې ستا هرې ادا ته یو غزل ویلو
کاپرې اخ! په هغې خوله دې خاورې واړولې

اوس د هادي د ژوند مرثیه لیکه او ژاړه ورته
د خپل شاعر په مات مات زړه دې خاورې واړولې