دار منظور، ځنځير منظور دی
۔۔۔۔۔۔۔۔۔۔۔۔۔۔۔۔۔۔۔۔۔۔
دار منظور، ځنځير منظور دی
هر یو ویښ ضمیر منظور دی
اقتدا يې پسې کړې
د سرتېرو غورځنګانو
روڼ ضمیر امیر منظور دی

د مقتل په دروازو کي۔۔۔ د زندان تورو کوټو کي
د وحشت خوني پنجو کي۔۔۔ یوه چغه را رسیږي
مړه بڅري لمبه کیږي۔۔۔۔ د پيړیو رټل سوي
د درانه خوبه ویښيږي
د منصور کیسه سړه سوه۔۔۔۔منظوري ناره تازه سوه
د دې دور دغه تقدیر دی
د دوی دور دغه تحریر دی
اقتدا يې پسې کړې
د سرتېرو غورځنګانو
روڼ ضمیر امیر منظور دی

ته! به کوم کوم دار ته یوسې۔۔۔ دلته هر یاغي منظور دی
د بیده پښتون اواز سو۔۔۔ هم د لر سو، هم د بر سو
یاغي سوې چغه پورته۔۔۔ د ”خیبر“ د زیږو پرښو
د ” سپين غر“ واوري لمبې سوې۔۔۔ په ” چونغر“ کې ازانګې سوې
په ” ګوربت“ کې زلزلې سوې
لړزېدلی بیا ” پامیر دی
اقتدا يې پسې کړې
د سرتېرو غورځنګانو
روڼ ضمیر امیر منظور دی

د دې دور ” خوشحال خان“ ۔۔۔ ”تور فرنګ“ سره په جنګ دی
پولادي هوډ يې دی کړی
کلک ولاړ د قام په ننګ دی
يو څادر دی، سره خولۍ ده ۔۔۔ ” باچا خان“ غوندي ملنګ دی
د ” ایپي“ په نغري کي۔۔۔ د ” روښان“ سکروټي پاشي
” پونده“ د رمې شپون سو۔۔۔ هم بهیر سو هم یې یون سو
د دې نوی دور یزید يې
اخته کړی په لوی ویر دی
اقتدا يې پسې کړې
د سرتېرو غورځنګانو
روڼ ضمیر امیر منظور دی