مه سر نذر کوه او مه بدن سیزا په اور
بس دا چې د وطن د پاره جوړ نه شې پېغور

څه وخت نامردي وکړه څه زما بدقسمتي
څه خلک بد ګومانه وو څه مونږ نه وو د زور

خبره چې د زړهٔ له تله کېږي د وطن
اول غزا ته ما ولیکه بیا وړوکی ورور

که دواړه وطني وای هم ساقي او هم شراب
ویل به مو څو اوس راوړه بیا نور راوړه بیا نور

مونږ کله دعوا کړې ده چې سپین یوو په لمن
مونږ کله ویریدلي یوو رقیبه ستا له تور

جانانه یوو ساړه چلند وهلي د یارانو
جانانه که کېدای شي په ګیلاس کې راوړه اور

مونږ تل له روایاتو نه جدا دریځ ساتو
ساتلي مو لستوڼي کې لړم دی که منګور