بې یادونو دې په بل څه بوخته نه شوم
هېڅ اوزګاره ژونده! ستا کارو ته نه شوم

لکه څانګه به راقات پخپل وجود شوم
چې حالاتو ماتولم ماته نه شوم

هغه هیڅکله له خپل ضده تېر نه شو
زه هم ښکته د غرور له تخته نه شوم

که هر څه مو دعاګانې رب ته وکړې
هغه زما او زه دې هغه بخته! نه شوم

ماویل لاړه به تر هسکو، هسکو غرو شم
را بهر لکه بندي له چته نه شوم

لکه تږې غوټۍ تویه شوم بې وخته
له تا وروسته را تازه پر دښته نه شوم

د پښتو او د ایمان پابندۍ! ګورې
مخامخ ولاړ جانان ته جوخته نه شوم