زما د ولس د ژوند څیره، راته بدله ښکاری
د پلار نیکه زړه دیره، راته بدله ښکاری
هم په ښارونو هم په کلو، را خوره ده تیاره

له پرون شپې د نن تیاره، راته بدله ښکاری
د بل په لور خو دا لاسونه، پخوانی اوږده دی

نن د اوږدو لاسو شمیره، راته بدله ښکاری
میندي په قهر کی بچو ته، څه ښیرا خو کوی

نن د درد منې مور ښیره، راته بدله ښکاری
پرونیو هم دا خپله خونه، له پردو ساتله

نن د ساتونکو دا پیره، راته بدله ښکاری
غرونواودښتوکی منزل کول، اسان خو نه وی

خو نن د تلــلو دا میره، راته بدله ښکاری
مـړې خو ټول ځي هدیرو ته، کلیواله ضرور

د دي ژوندیو مـړو هدیره، راته بدله ښکاری
جولای/ ۲۲/ ۲۰۱۷
تورنتو ــ کانادا