هغه دوې مینې ته لیوالې ښکارېدې خو نه وې
هسې له لرې کلیوالې ښکارېدې خو نه وې

د هغه کلي په ښایست خطا وتلي وو موږ
په چینارونو کې یې ځالې ښکارېدې خو نه وې

نه غرڅنۍ سترګې، نه رم، نه خرامانه رفتار
تش په سینګار لکه غزالې ښکارېدې خو نه وې

حرص د چوکۍ پای کې ختلی و د مشر سر ته
ځینې خبرې یې نورمالې ښکارېدې خو نه وې

هغوی بیا روسته (ان.جي.او)جوړه لندن ته لاړې
موږ ساده ګانو ته ملالې ښکارېدې خو نه وې

موږ چې را ونړېدو، وران شوو، چور – تالان شوو، ورک شوو
زمانې موږه ته زوالې ښکارېدې خو نه وې

د چین ماچین د ښاپېرو مې اورېدلي و ډېر
زما د خیال د نجونو سیالې ښکارېدې خو نه وې

چې لکه ژاولې دې ژوولې بېکسیاره شونډې
ځواب به غواړي که حلالې ښکارېدې خو نه وې