وباوې راغلې په نوبت سره او غلې، غلې
وباوې راغلې، موږ بېوسه ورته
نو خامخا به د هرڅه وي زنکدن همدلته
لکه چنگیز چې پر بامیانو وکړل:
نارینه بیا ورپسې ښځې، ماشومان او څاروي
ورپسې ونې او ولاړ دېوال هم
دوی په وروستۍ سا کې د خپلو اولادونو وروستۍ سا لیدله
وباوې راغلې په نوبت سره او غلې، غلې
وباوې راغلې، موږ بېوسه ورته
اول بدلون و له یو سرهٔ رنگ سره
جگړه هم غلې ورپسې وه راروانه شنه جنډه ورسره
سادگان لارو کې ولاړ وو او جگړې تې ښه راغلاست ویلې
هوښیارو چغې کړې ویل یې تباهي ده گورئ
د شنو چې څه له لاسه وشول
ویې نه سپمول
بیا کورونا را میلمنه شوه ښه خاموشه بلا
څومره یې وخوړل او خوري یې پسې
اوس وار د سپینې پگړۍ سپینې جنډې
نه د چا اوري، نه څه گوري
چې یې زړه غواړي هماغه کوي
خپله «تباره» تیزوي وړاندې ځي
په هرڅه ـ هرڅه یې لاس پښې وتړل
خولې سترگې بندې شولې
دا خو لا پرېـږده واوره:
یو نه لیدونکی ډار پر لارې دی زموږ کلي ته
بلا هماغه او قانون هماغه
توره جنډه غواړي د سپینې پرځای
هوښیاران ژاړي وايي نه دې راځي
سادگان خاندي وايي رادې شي، زموږ یې پرې څه

۰۲/۰۱/۲۰۲۳
هېدر سلیف
ډنمارک