هغه اسونه،

چې د نقاشۍ د تابلو په شنه ورشو کې څري،

هیڅکله نه خولې کیږي

***

کډواله مرغۍ

د هغو ونو پر څانګو نه کیني،

چې د تختوځالې يې

د نجار په میخ نښلول شوې وي.

***

میخونه ښه پوهېږي

چې «سر» به ونه ساتي

سر

څه په څټک وهلی

او څه بایللی له څټکه د درواغجنې خپلواکۍ په نامه

***

هغه سروې،

چې باغوان یې سینګاروي،

هيڅکله

د ځنګله په هغو نښترونو ودېدلای نه شي،

چې د توپان د قهرجنو اسونو لاره نیسي
هغه اسونه،

چې د نښترو په ډګر کې ځغلي

خولې کیږي

او که ځنګله ته را کوز شوی د غره باز

په نښترو کې د ځغستلي اس خوله وڅښي

څلویښت شېبې روسته به

د باز ججوري کې یو سور غمی پردې نه ووځي

ستا د سرو شونډو رنګ د دغه سور غمي غوندې دی

دا رنګ لا هېڅ نقاش لیدلی نه دی.

ځکه نو

هغه اسونه،

چې د نقاشۍ په شنه ورشو کې څري

نه خولې کیږي.
.