چاته چې زړه ورکړمه بدل کې یې نفرت وړمه
خپل زړګی مې ژاړمه اوبو ته شکایت وړمه

زما د وجود هر غړی زخمي او جدا شویدی
پورې هدیرې ته مې دا خپل شهید قامت وړمه

زما د سرودونو له هر توري چې راوڅاڅي
غواړمه فریاد یې کړمه درد مې د ملت وړمه

ښه یې په شیبه کې، په شیبه کې یاره ورانه شې
ستا له خوږو سترګو سلسله د شرارت وړمه

خدایه زما پښتون زړه دې په کومې ګناه ونیوه؟
څو به پر اوږو دا زندګي لکه قیامت وړمه

بس دی د نفرت په اور کې ډیر کلونه وسوځید
ځم هادي ولس ته مې سوغات د محبت وړمه