مودې شوې لرې یې له ما نه، ته به څنگه ښکارې؟
زه سوی سکور یم به له تا نه، ته به څنگه ښکارې؟
ستا د تندي د خال ښایست جوړه په هند کې نه وه
اوس یې کډواله، پریشانه، ته به څنگه ښکارې؟
ستا د تگ ویر، ناگاساکي غوندې له منځه یوړم
ذره، ذره یمه جانانه، ته به څنگه ښکارې؟
توپان دی گډ په هغه خاوره چې مین وو پرې موږ
زه پسې مړ یم له خفگانه، ته به څنگه ښکارې؟
د ښار مُفتي بُلبُلي‌غږ پسې رانجه راخیستي
زه یې فتواوو ته حیرانه، ته به څنگه ښکارې؟
نوې پېـړۍ، زړې خبرې، د هیچا نه مني
پیغلې په تنگ له مُلاجانه، ته په څنگه ښکارې؟
۲۸/۸/۲۰۲۴
ستاکلهم، سویدن