د سترګو کسو ته باڼه اغزي شول
د مور زامن لاړل د بل پوزي1 شول
پر یوه غیږ پر یوه خاوره را لوې
لرې له خيل شول له پردو پردي شول
پر نیمه لاره نیمه خوا پاتې یوو
ستر هوډ لرونکي مو پر اور ستي شول
چې یې د هیلو ډیوې بلې وړلې
اوس یې هیر کړي پر بل خوا رهي شول
پر دښتو سره غاټول ونه غوړیدل
غاړې یې وچې پاتې وچ لرګي شول
واکدار پر جبر د ولس ساه زندۍ کړه
ځوانان پر تیښته د ظالم بندي شول
پر ګریوانه یې را تویږې اوښکې
جینکو ویل زموږه مات تندي شول
د ژوند ډګر کې مو ماتم روان دی
ښوونکې څه لا ښوونځي ګونګي شول
پر جنتي خاوره ړانده حاکم دي
لالونه ورک، پردو ګاڼو غمي شول
۱-پوزې یا پزه کې د کلو او بانډو خلکو د کور فرش دی.