پښتو شعرونه
د پښتو شاعرانو نړۍ ته ښه راغلاست
د تړلې دروازې شاته یوه نجلۍ
د تړلې دروازې شاته یوه نجلۍ
ـــــــــــــــــــــــــــــــــــــــــــــــــــــــــــــــــــــــــــ
مه ژاړه ښکلې نجلۍ !
دا دروازه که هر څومره تړل شوې هم وي
بیا هم غږ دې اوریدای شي .
پوهیږم
ستا کوشني تنکي لاسونه
د دې تیږو دیوالونو زور نه لري
خو پوه شه چې
باران هیڅکله د کورونو د چتونو د ماتولو د پاره
له ځانه سره تبر نه ګرځوي
+ + + +
څاڅکی اوسه
په دې زنګ وهلیو کلپونو وڅاڅه
څو دا زاړه کلپونه
له شرمه خپله خلاص شي
ګډوډ ویښتان دې باد ته وسپاره
پریږده چې خوږ نسیم دې د زړه چیغې
له دیوالونو ها خوا سیموته یوسي
ووایه !
(( زه چوپتیا ته نه یمه راغلې
زه راغلې یم چې یو څه زده کړم ))
ووایه !
چې دا خاوره یوازې د نارینه وو د پښو د پاره نه ده
نو مه ژاړه ښکلې نجلۍ !
اوښکې دې را ټولې کړه
او رنګ ورڅخه جوړ کړه
چې د سبا د پاره پرې لیکل وکړې
او پوه شه
دا کوم کولپ چې په دروازې راځړول شوې
دا به یوه ورځ لکه کنګل دا ستا د مخ په پستې رڼا اوبه شي
او باد به دې سندرې ځانه سره یوسي
او لمر به دې لکه ګل
په سپیرو کمڅیو وځړیږي
او دا تړلې دروازه به هم
ستا په کتو
لکه غنچه وغوړیږي