د اختر ورځې به په کومه خوشالۍ لمانځمه
ښوونځي بند دي له زور جبر وحشتو ژاړمه

په اووم ټولګې کې ازموینه مې نیمګړې پاتې
څلور کلونو کې له زده کړو پرته څه غواړمه؟

د لوړو زده کړو ارمانونه مې پر زړه پاتې دې
ناپوه حاکم تیارې راوړې خو زه رڼا پالمه

په ګاونډی هیواد کې پیغلې پوهنتون ته درومي
په بسخیدلی زړه خپل حال ګورم دوی بیا څارمه

نه په اسلام او نه نړۍ په کوم قانون کې شته دی
دوې په تورتم کې موږ ساتي خو زه ځلا راوړمه

ټولنه هله پرمختګ کوي پر وړاندې درومې
عالمې مور په غږ به مخکې شم رسا راځمه

په زور واکۍ چې دوي زموږ هر یو ارمان زپلی
د تنکو زړونو سوزونکو ته سزا غواړمه

د مورولۍ د لورولۍ د خورولۍ مقام یم
اوسپنیز هوډ لرم د هیلو څلې یاد لرمه