ناسته په تمه یم وعده مې هیره کړې نه ده
روانیدو هغه شیبه مې هیره کړې نه ده
تا مې پڼې پر طلاې تار راته وه اوبدلې
د مشدۍ هغه شمله مې هیره کړې نه ده
د ګودر غاړه کې زما په انتظار ولاړ وي
د مازدیګر لمر غرغره مې هیره کړې نه ده
د لونګین هر یو ځونډی مې ستا په نوم پییلې
ستا د شپلۍ هغه نغمه مې هیره کړې نه ده
پر بره لار رانه جلا شوې تا ویل ژر به راځم
تیرشو کلونه ستا پلمه مې هیره کړې نه ده
د دیدن ځاې ته په وعده خپلې پوره راتللې
جزبه د مینې ها چینه مې هیره کړې نه ده
هجرت که ټوله خوشالي راته له زړو وړې ده
د بیلتون درد خوږه لیمه مې هیره کړې نه ده
کڼو غوږونو کې د ژوند ازانکه پورته به کړو
د نوي یون نوې څپه مې هیره کړې نه ده
دا اسمان څکي که ودان دي نو زموږ خو نه دي
د کلي منځ ورانه کوڅه مې هیره کړې نه ده