سوی سیوری

ــــــــــــــ

دښمن!

د تیارو له هغې غاړې

یوه تڼۍ په تورو ګوتو کښېکاږله.

شیبه وروسته لوی آسمان

زموږه په ورستو بامو راولوېد.
د دیوالونو پښې

د بوډاګانو په شان ورپېدې

او کړکیو خپلې سترګې کړلې پټې

دغه تور ساعت یې و نه شوای زغملای.
یوې مور

د دوړو منځ کې

خپل ماشوم پسې چیغې وهلې

کوڅه نه پوهېده

څنګه مورکۍ پوه کړي

چې ماشوم یې

له لوګیو سره والوت.
خاورې بوی د وینو واخیست

او زمان څو شیبې ودرېد.
هلته

د خاور د انبار ترڅنګ

د انسان یو سوی سیوری ښورېده

شیبه وروسته

یوه باد هغه سوی سیوری

ورو ورو د هېڅ لوري په لور یووړ .