داسمان زړه کې وریځې ټل شي ځې تری لاره ورکه
ښکـتـه او پورته يو دلدل شـي ځي تـرې لاره ورکـه

ګـوګل يې وسـوځي جـوړ تـنـدر طـوفان وپـنځېـږي
اوښکې باران شيبه راتل شی ځي ترې لاره ورکـه

ځمکې نه پورته د وحشـت نارې دي هر خوا شور دی
د انسان ژوند په اور جل بل شي ځي ترې لاره ورکه

دلتـه خـاورین بنده د حرص پر نیلي سپور ځغلیـږي
پر خپل بې حال ذهن لل ګل شي ځي ترې لاره ورکه

عـلـم خــرد د پـاک رب لـویــه لـوریـنـه ده خـــو
د نـاشـولـتـو لاس کې دل شی ځـي تـرې لاره ورکـه

تـکـنـالوژۍ له چاپيـريـال کــړه ســوکالـي راټــولــه
هر پرمختګ یې ستر جدل شي ځي ترې لاره ورکه

د غــره پـه تـړ کې غـرڅــنۍ لـه انسانـانـو تـښتـې
بـې مـروتـه یې اجل شي ځـي تـرې لاره ورکـه

چې د دردمند زړونو اواز د چـا تر غوږ نـه رسـي
بې حسه ژوند يې بې انډول شي ځي ترې لاره ورکه

سـوکه سـوکه ځـي لـه انـسـانـه مـروت مـحـبـت
بـې خاصـیته او شـډل شـي ځـي ترې لاره ورکه

ټول کائينات رب (ج) ته سنا کړي په نغمه د مينې
انسان مادياتو سره مل شی ځي ترې لاره ورکه