د خوبونو رڼا

ـــــــــــــ
جګړه !

تل

د ټوپک په تورو ډزو نه پیلېږي

جګړه !

کله کله هغه وخت پیلېږي

چې تنور سوړ شي

او د ډوډۍ طلايی خوشبویي

د بندو دروازو ترشا زړه شي

او د غنمو زرغونې خوشې

د باد په اوږو

د سندرو په ځای سلګۍ ووهي

او کوترې

د بامونو په ځای

له لوګیو څخه

ځانته ځالې جوړې کړي .
جګړه هغه وخت پیلیږي

کله چې

د بورو د اوښکو آیینو کې

د مړو بچوړو !

په وینو سور تصویر ټوټې ټوټې ښکاره شي

او لمر

د هغو کړکیو له مخې غلی تېر شي

چې د ماشومانو د خوبونو رڼا

پکې زخمی پرته وي

ځکه لمر هغه تیارې نه رڼوي

چې د بنیادم له فکره پیدا کیږي

نو

جګړه !

کله کله د توپک په تورو ډزو نه پیلیږي

جګړه !

هغه شیبه ده

چی انسان د بل درد

لکه خپل درد

په سینه کې احساس نه کړي