د انګورو په نقاب کې

ــــــــــــــــــــــــــــــــــــــــــــــــــــــــــــ
دا ځینې خلک

د انګورو په نقاب کې

څه بې رحمه ګوزارونه کوي
له مسکا یې

د تازه شرابو عطر پورته کیږي

خو لاس به یې

د تورې چړې بوی کا
له شیریني

په ډکې خولې به در نژدې شي

ته وا زړه که ځیګر ورکړم

خو شیبه کې به دې زړه

د انګورو د خوږې دانې په شانې

خپلو ګوتوکې کیښکاږي.
عجیبه ده

تر ټولو ښکلي نقابونه

د بدو نیتونو د پټولو د پاره

غوره کیږي

خو زه

نور له انګورو څخه نه

هغو سپینو لاسو څخه ویریږم

چې د انګور خوشه تحفه درکوي

ځکه پوه شوی یمه

چی هره شیریني

د خوړو د پاره نه وي

ځینې شیرینیانې ددې د پاره وي

چی په پیل کې

د زخم په درد پوه نه شې