نوی پیغام او نوې ساه
تورو سترګو د بڼو شاته
دا ځلیدلې اوښکې
غم او خوښۍ بڅري
په تویدو کې نوې لار لټوي
لکه د مني موسم
د زړې ونې خاښ یې باد ښوروي
چې یې له څانګې رالویدلې پاڼه
سیلۍ څپه کې پر هوا تاویږې
د ژوندون لنډ مزل تر شا پریږدي
او په یو بله هستۍ
بیا را ټوکیږي نوې ساه اخلي
نوی موسم بله رڼا اخلي
او سپیده چاود کې
پر سپیره دښته
له روان شوي کاروان
بل شوي اور نه
پاتې شوې ایرې
سهار وختي
د کوچۍ پیغلې مات بنګړی
د لمر زرینو پلوشو کې
شنه رڼا کوي
د بل کاروان په تمه
د شنه موسم تر دمه
کړي د ژوندون لار سمه
بیا ستنیدو لپاره
په بله بڼه او رنګ
اسمان او زمکه
، غرونه راغونه او سیندونه واړه
پر طبیعت ټوله هستي همغاړه
نوی پیغام او نوې ساه خپروي
نوی پیغام او نوې ساه خپروي