دا چې زړونو کښې تورتم دی



دا د ټولو نه لوئي غم دی!!



کۀ جذبه د لېونتوب وي



نو منزل ته يؤ قدم دی



حال د ژوند بس دومره ډېر دی



چې حالاتو سره سم دی



علامت د بربادۍ دی



مونږ تراشلی چې صنم دی



(ق)



يؤ سړی چې هيڅ يې نۀ زده



استاد هم دے، لارښود هم دی



دا لا کوم وحشت راخور دی



د هر چا سترګو کښې نم دی؟



(ق)



د ښار ډېرې دروازې دي



اؤ په هره يوه کښې غم دی!



دا تاريخ ورانول ګران دي



دا په زړونو کښې رقم دی



د ژوند ډېرې تقاضې دي



د انسان عُمر ډېر کم دی