تورې تيارې دي د وختونو ډېوې بلې نه شوې
زمونږ د چم پر ديواونو ډېوې بلې نه شوې



ښکاري چې ژوند مو وي له کلي څخه کډه کړي
د چا په کور د اخترونو ډېوې بلې نه شوې



د وخت سيليو مو د هيلو غوټئ خاورې کړلې
د يوه زړه د اميدونو ډېوې بلې نه شوې



چپې د اوښکو مو د سترګو ګردابونو کې دي
زمونږ د شاړو جوماتونو ډېوې بلې نه شوې



منبر په خاورو کې سپېره جومات امام نه لري
اذان خاموش، د محرابونو ډېوې بلې نه شوې



د تروږمو ديوانو مړې کړې دښکلا ښاپيرئ
د ړنګو بنګو محلونو ډېوې بلې نه شوې



وايي نصرت اى د نړۍ د ښکلاګانو ربه
زمونږ د خاورو د کورونو ډېوې بلې نه شوې