څومره چې شين و هومره سور شو سپرلى
زخمي زخمي شولو ناسور شو سپرلى



زمونږ له کلي نه يې کډه وکړه
خزان په دار کړلو منصور شو سپرلى



پکې د سرو ګلونو سا وخته
ځکه خو تښتې ته مجبور شو سپرلى



د جنګ لمبو کې يې وږمې وسولې
لمبه لمبه په سره تنور شو سپرلى



د غوټۍ زلفې له ازغو ډکې شوې
خزان خزان په کوم قصور شو سپرلى



زمونږ له کلي نه يې کډه وکړه
په ځنکدن شولو رنځور شو سپرلى



نصرته چا يې سلګۍ وانه وريدې
د ګل په سرو شونډو ترور شو سپرلى