يوه خاوره، يو بچى، يو ولس او يو عزت دى
وروره راشه سوله وكړو دا لا څرنګه الفت دى



ته زما بچى راوژنې ته زما ښوونځي راسوځې
ټول جهان پر تا پوهېږي دا يو روڼ شان حقيقت دى



چانه ورك دي اولادونه څوك د غم پر ټغر ناست دي
د چا نيم وجود چې نه وي بيا هم وايي غنيمت دى



زما د پاكې خاورې ګل هم د باروتو بوى اخيستى
دا په خپله د دې سيمې د ښكلاوو هلاكت دى



نور به څه وايمه خلكه، تاسو ټول په دې پوهېږئ
هره خواته هېوادپاله، سم قيامت دى سم قيامت دى