مولانا جلال الدين محمد بلخي ته
د عقيدت پيرزوينې
(څلوريزې)
ته صوفي وې فلسفي وې ستر انسان وې
حقيقت کې رسيدلى تر جانان وې
ستا فکرونه مو په زړونو حکومت کړي
په نړۍ کې ځلاند ستورى د عرفان وې
٢١\١\١٣٩١ هرات



مولانا ته حق پرست وې دين پرست وې
له دنيا نه بې پروا وې خداي پرست وې
د عرفان شمعې دې بلې کړې نړۍ کې
ته د رب په پاکه مينه باندې مست وې
٢١\١\١٣٩١ هرات



د عرفان رنګين ګلونه درسره وو
د توحيد عالي فکرونه درسره وو
رڼاګانې، ځلاګانې، ښکلاګانې
د حق ښکلي پيغامونه درسره وو
٢١\١\١٣٩١ هرات

ته شيدا وې ته عاشق وې ته مجنون وې
محبت کې رسيدلى تر جنون وې
د رڼا له قافلو سره دې يون وو
ته د مينې لاروى د حق مفتون وې
٢١\١\١٣٩١ هرات



لکه لمر هسې ځليږې په دنيا کې
ته په زړونو کې اوسيږې په دنيا کې
د عرفان او معرفت بله ډيوه وې
تر قيامته به ياديږې په دنيا کې
٢١\١\١٣٩١ هرات



ته د وخت د تصوف لوى شهنشاه وې
په ظاهره که ګدا وې پټ پاداه وې
اي د عشق و معرفت په ميو مسته
ته زما د هر چا وې ددنيا وې
٢١\١\١٣٩١ هرات



تا د عشق له خم نه راوړل ډک جامونه
د توحيد د فلسفې رنګين بابونه
اى د ژوند ددبستان لويه استاده
تر ابده به ژوندي وي ستا فکرونه
٢١ \١\١٣٩١ هرات