د ځوانۍ مې بهارونه راغلل تیر شول
په وطن مې خزانونه راغلل تیر شول


زموږ خاوره د جنګونو لابراتوارشوه
رنګارنګ پرې یرغلونه راغلل تیر شول


له زخمونو د قربان شمه وطنه
په تا ډیر عظیم دردونه راغلل تیر شول


ستا د ویش ارمان به ګورته سره یوسي
د دښمنو لښکرونه راغلل تیر شول


دا وطن یې د بچیانو همت ساتي
د ویشلو یې پلانونه راغلل تیر شول


اې لار ورکو د آرمان درنو ملګرو
لمر راخیژی ما ښامونه راغلل تیر شول


حوصله د لاسه ورنکړې افغانه
د تاریخ د غم موجونه راغلل تیر شول