ډار په هر زړه ننوتى

ډار د تورې بلا غوندې

خوشالي او هوس وړي

ډار د ژوند له هره لوري

کرار وړى دى په زوره

تور مېږي د اندېښنو دي

چي د هر سړي زړګى خوري

هر سړى زموږ د کلي

تل وهي دغه چورتونه

چي د جنګ بلا به راشي

ما به يوسي له خپل کوره

ما به وخوري، ما به مړ کړي

ډار درانه لاسونه ايښي

د ژوندون پر ستوني باندې

چي هيڅ ږغ کولاى نه شي

او نه ښور دى پکې پاته

د هر چا ماغزۀ چيچلي

تور لړم د ډار، د جنګ دي

لويه خدايه! بندګان دي

د ژوندون په کور کې تنګ دي.

 ^^^

٧ جولاى ٢٠٠٨م کال

                                                      کابل- وزيراکبرخان مېنه