ژوند یو لنډه افسانه ده ځي تېرېږي
سترګو رپ یوه شېبه ده ځي تېرېږي
یو فرصت له طبیعت دی تحفه شوی
د ګردون یوه هدیه ده ځي تېرېږي
په میلیارد چانسونه یو بل سره ګډ شول
د نیستۍ، شتون ګډوله ده ځي تېرېږي
د سپرلي سهار د زاڼو یو کتار دی
د څاروو یوه ګله ده ځي تېرېږي
په نیمګړو ارمانو ترې کډې بار شي
د ناکام هیلو اسره ده ځي تېرېږي
بیرته نه ګرځي که هرڅو منتظر شې
د روان سیند یو شېله ده ځي تېرېږي
مرادزی يي که هر څو ښکلاوې ستا يي
د یو فیلم ننداره ده ځي تېرېږي
سرلوڅ مرادزی