جوړې خبر دی ، په زړه لاس ونيسه
اوتر اوتر دی ، په زړه لاس ونيسه
زيړ مازيګر دی ، په زړه لاس ونيسه
د غلا خطر دی ، په زړه لاس ونيسه

دا د کابل مړژواندي ښکلي نه دي
شوخ پېښور دی ، په زړه لاس ونيسه

د سترګو موج يې په ځوانۍ راغلی
مست سمندر دی ، په زړه لاس ونيسه

پام کوه پام چې درنه پرې نه وځي
د هغې ور دی ، په زړه لاس ونيسه

څوک دی ؟ چې داغ به ورله نه ورکوي
په چا باور دی ؟ ، په زړه لاس ونيسه

جلاله ! بيا د دې غلې سترګې جلۍ
په تا نظر دی ، په زړه لاس ونيسه