ښکلې دا څرنګه وږمه شوې چې چا ونه ليدې؟
د ښاپېرو د باغ کيسه شوې چې چا ونه ليدې؟

پر لاره پل دې لا تازه  و  لا پرې ګرد نه  و پروت
خدايږو چې تېره څه شېبه شوې چې چا ونه ليدې؟

د وصل خياله چېرته وې خو اورېدلي مې دي
جوړ حقيقت وې هنګامه شوې چې چا ونه ليدې؟

يه نامراد سپرله، يه زما بې وسې ځوانۍ
تېر په څه داسې تلوسه شوې چې چا ونه ليدې؟

ښکلې راتلې پدې لار ټوله فضا مسکه وه نن
خو دا چې کومې نه ستنه شوې چې چا ونه ليدې؟

د "بېکسيار" د سوي ژوند د ارمانونو سپوږمۍ
هسکه په هسې توره شپه شوې چې چا ونه ليدې؟