د عظيم خوب عظيم تعبير پښتونخوا
د لوی معمار شهکار تعمير پښتونخوا

پښتانه ټول لکه يو ښکلی وجود
ددې وجود دی د ملا تير پښتونخوا

غليمه پام چې تېر قدم وانخلې
پښو ته دې پرېوتو زنځير پښتونخوا

هضم يې نه کړو که خوړلی يې و
زما ميراث زما جاگير پښتونخوا

نه به د لوی خيبر نظير پيدا شي
نه به هيڅ ولري نظير پښتونخوا

نن هغه څوک د ځان په وير اخته دي
چاچې لړلی وو په وير پښتونخوا

خدايه د خوار هم پکې ژوند بدل کړې
ټوله دې نه شي د امير پښتونخوا

جنت کې گرځي ابدالي ممتازه
ښايي هر چاته يو تصوير پښتونخوا .