افغان اتلان · ادب او کلتور
پښتو شعرونه
د پښتو شاعرانو نړۍ ته ښه راغلاست
299 شاعران4249 شعرونه
زمونږه په سرو وینو یې اودس کړی لمانځه ته
ساقي خپله پوهیږې دا ناکام ویلی نه شم
مدام یې راکوه درته مدام ویلی نه شم
زمونږه په سرو وینو یې اودس کړی لمانځه ته
یارانو دی ُملا ته خو امام ویلی نه شم
د ستر خوشحال بچی راته په ټیټو سترګو اووې
غلام یمه خو خپل ځان ته غلام ویلی نه شم
جام هله جام باله شی چې په لاس کې د خیام وی
په لاس کې د شیخانو ورته جام ویلی نه شم
منکر د مصلحت یمه کافر مې ځکه بولي
تش ږیرو او تسپو ته چې اسلام ویلی نه شم
د وخت سحرګرانو که هر څه ادل بدل کړل
سحر ته به سحر وایم ماښام ویلی نه شم
راشده چې د سره سالو لمبې یې په سر نه وي
که هر څومره اوچت شی ورته بام ویلی نه شم
- ۲۳ مارچ ۱۹۹۷
ګورا قبرستان - پیښور
کتاب « ډیوې»