راشه چې وکړم ستا د حسن ديدنونه نن بيا
زما په سترګو باندى کيږده قدمونه نن بيا

د پسرلي په شنه لمن کې زما د هيلو په بڼ
د خيال په ټال کې په نڅا کړه انځورونه نن بيا

که مې نصيب د ستا ليدل وي زه به ووينمه
دا ستا د ګل غوندې پرمخ ښايسته خالونه نن بيا

اوس چې راغلې ستا د حسن پسرلي په چمن
زما په شونډو غوړيدلي دي ګلونه نن بيا

په يو نظر ماته دمينې افسانه ووايه
زما په غاړه کې راواچوه لاسونه نن بيا

دا ستا د سترګو ليونۍ يم خو ويلي نشم
د زړه په ژبه درته وايم غزلونه نن بيا

زرغونه ستا په تمه چې ته يو ځل راشي 
په مينه لرې کړه د زړه زاړه غمونه نن بيا