بهرملکونو پرمختګ کړی دی
دومره چې زه او ته حیران شو ورته
په همدې حال لاس او ګرېوان شو ورته
او دوی زمونږه نندارې ته کینې
د یوه ژوندي فلم کیسه جوړوی
خو زه او ته ددې کیسې په راز خبر هم نه یو
چې طراحي یې له بهره کېږي
او مونږه دواړه یې د وینې د ټکر لوبغاړي
 * * *
بهر ملکونو پرمختګ کړی دی
ګوره چې مچ یې نن له میاشې سره کراس کړلو
د دوی له وصله یې بل ډول مخلوق پیدا کړ
چې بېشرمي یې د تور مچ له حده تېره ښکاري
بې حیايي بیا له میاشې نه هم ډېره ښکاري
دغه مخلوق په سپینه ورځ د مچ خواص کاروي
چې څنګه شپه شي نو د میاشې خاصیت را واخلي
 * * *
بهر ملکونو پرمختګ کړی دی
لا هم لګیا دي تجربې زموږ په وینه کوي
ګوره د میاشې او د مچ خواص یې
زمونږ په وینه ګډ کړل
د آزادۍ
ډیموکراسۍ
د خوسا شوې ګوړې
په دې سرېښناکه ډنډ یې
زه هم بربنډ
ته هم بربنډ
داسې ورخوشې کړلو
خدای خبر څنګه به راوځو ترېنه ؟؟؟؟