په سره ټکه غرمه په انتظار د سېوري لاندې
یو ښکلی شان ماشوم اوده په لار د سیوري لاندې

راځه چې دا دنیا یو څو شیبې کړو سره هیره
راځه چې هلته کینو لږ قرار د سیوري لاندې

سپوږمۍ پسې ېې دومره غټه تیږه وه راخستې
پټ پټ و راروان لکه لوټمار د سیوري لاندې

ضرور دی چې به دنګو جینکو ته غلي ګوري
دا نن صبا د ژڼو نور څه کار د سیوري لاندې

هغه د کلي مست د ژڼو سر چې مساپر شو
ګونګۍ هره حجره او هر بنډار د سیوري لاندې

ترې ډیرې نوې کوډې به رازده کړم د سندرو
ارمان سره که کینمه یو وار د سیوري لاندې