په ایراني پوهنتونونو کې نږدې ۶۰ زره افغان زدهکړیالان پر زدهکړو بوخت دي

ایراني چارواکي وايي، اوس مهال ۵۹ زره او ۶۵۸ افغان زدهکړیالان د دغه هېواد په پوهنتونونو او علمي مرکزونو کې پر زدهکړو بوخت دي. دا څرګندونې په داسې حال کې شوې چې ایران له نړیوالې ټولنې د کډوالو کوربه هېوادونو ته د مالي ملاتړ د زیاتولو غوښتنه کړې ده.
د ایران د بهرنیو وګړو او کډوالو چارو ادارې مشر نادر یاراحمدي د ملګرو ملتونو د کډوالو عالي کمیشنرۍ د اجرائیوي کمېټې په اووهاویاو نههویمه کلنۍ غونډه کې، چې په جنیوا کې جوړه شوې وه، د افغان زدهکړیالانو د زدهکړو په اړه معلومات وړاندې کړل.
یاراحمدي وویل، زرګونه افغانان د ایران په پوهنتونونو کې لوړې زدهکړې کوي او تر دې وړاندې هم د افغانستان ګڼ شمېر وګړي د دغه هېواد له لوړو زدهکړو بنسټونو فارغ شوي دي. نوموړي زیاته کړه چې ایران له څو لسیزو راهیسې د کډوالو او پناهغوښتونکو کوربه دی او هغوی ته یې د زدهکړو او روغتیا په ګډون یو شمېر عامه خدمتونه برابر کړي دي.
د نوموړي په وینا، د کډوالو کوربه هېوادونو ته د نړیوالې ټولنې اوسنی مالي ملاتړ کافي نه دی. هغه غوښتنه وکړه چې د کډوالو د کوربهتوب مسوولیت دې د هېوادونو ترمنځ په عادلانه ډول ووېشل شي او د مرستو، سرچینو او پرمختیايي ملاتړ کچه دې لوړه شي.
ایراني چارواکي ادعا کوي چې په دغه هېواد کې د ملګرو ملتونو د کډوالو عالي کمیشنرۍ د فعالیتونو کلنۍ مالي اړتیا په تېرو کلونو کې شاوخوا ۱۴۰ میلیونه ډالره وه؛ خو د هغوی په وینا، په ۲۰۲۵ کال کې د دې اړتیا له لس سلنې څخه هم کمه برخه تمویل شوې ده.
د ملګرو ملتونو د کډوالو عالي کمیشنر برهم صالح په همدې غونډه کې له ایران څخه د هغو کډوالو د کوربهتوب له امله مننه کړې چې دغه هېواد یې له څو لسیزو راهیسې ملاتړ کوي. ایران د افغان کډوالو او پناهغوښتونکو له مهمو کوربه هېوادونو څخه بلل شوی دی.
په ایران کې مېشت افغان وګړي زدهکړو، روغتیايي خدمتونو او نورو لومړنیو اسانتیاوو ته اړتیا لري. په غونډه کې مطرح شوې څرګندونې د کډوالو د اړتیاوو د پوره کولو او د کوربه هېوادونو د مسوولیتونو د عادلانه وېش لپاره د نړیوالو مرستو پر زیاتولو ټینګار کوي.