د افغان کرکټ د مینه‌والو کورEnglish ↗
افغان اتلان
کورپاڼه خبرونه

مجاهد: له رسنیو سره پر وخت د کره معلوماتو شریکول مهم دي

افغان اتلان · پښتو
مجاهد: له رسنیو سره پر وخت د کره معلوماتو شریکول مهم دي

د اسلامي امارت ویاند ذبیح‌الله مجاهد وايي، حکومت د رسنیو د سانسور اراده نه لري، خو هغه مطالب چې د ده په وینا د ملي مصلحتونو خلاف وي او خپرېدو ته اړتیا ونه لري، نه خپرول یې باید د سانسور په معنا تعبیر نه شي.

مجاهد دغه څرګندونې د کندهار ولایت په مقام کې له خبریالانو سره د لیدنې پر مهال وکړې. په دې ناسته کې د کندهار نوي مرستیال والي مولوي سیف‌الدین تایب هم ګډون کړی و او د رسنیو د فعالیتونو، معلوماتو ته د لاسرسي او د عامه پوهاوي په اړه خبرې وشوې.

د اسلامي امارت ویاند د خبریالانو هڅې وستایلې او ویې ویل چې هغوی ته باید د کار لپاره لازمې اسانتیاوې برابرې شي. هغه له دولتي ویاندویانو وغوښتل چې د پېښو او نورو مهمو موضوعاتو په اړه کره معلومات پر وخت له رسنیو سره شریک کړي، څو د اوازو مخه ونیول شي او د معلوماتو په برخه کې روڼتیا رامنځته شي.

مجاهد وویل، د رسمي معلوماتو پر وخت شریکول به خبریالانو ته زمینه برابره کړي چې د خلکو پوښتنو ته دقیق ځوابونه ومومي او د ناسمو معلوماتو له خپرېدو مخنیوی وکړي. هغه ادعا وکړه چې ځینې بهرنۍ کړۍ د افغانستان په اړه د رسنیزې ناامنۍ د رامنځته کولو هڅه کوي، خو د ده په وینا، دا هڅې به بریالۍ نه شي.

مجاهد په ټول هېواد کې امنیت ښه وباله، خو ویې ویل چې ځینې کړۍ کوچنۍ پېښې لویې ښيي او له دې لارې د خلکو ترمنځ اندېښنې پیدا کوي. د ده څرګندونې په داسې حال کې دي چې په ناسته کې د خبریالانو او دولتي چارواکو ترمنځ د معلوماتو د شریکولو او د راپورونو د محتوا پر څرنګوالي بحث وشو.

د کندهار مرستیال والي مولوي سیف‌الدین تایب وویل، ځینې هېوادونه له افغانانو سره فکري جګړه پر مخ وړي. هغه له خبریالانو وغوښتل چې د دغې موضوع پر وړاندې هوښیار واوسي او د افغانستان د دښمنانو د ناسمو تبلیغاتو او پروپاګنډو پر وړاندې د عامه پوهاوي په برخه کې خپل مسوولیت ترسره کړي.

په مقابل کې، خبریالانو وویل چې د اسلامي امارت د اصولو په چوکاټ کې خپل راپورونه خپروي، خو هغه مطالب چې د خلکو ورځنۍ ستونزې، غوښتنې او اړتیاوې بیانوي، باید د حکومت پر وړاندې د نیوکې په معنا ونه ګڼل شي. هغوی ټینګار وکړ چې د خلکو د ستونزو مطرح کول د خبریالۍ مسلکي مسوولیت دی او د رسنیو له لارې د خلکو غږ چارواکو ته رسول د ستونزو د حل لپاره مهم دي.